معلش حاول تحب مصر

[سامية]

قديما قالوا لنا إن حب الوطن من الإيمان .. أيوة حب الوطن ( اللي هو عندنا مصر ) من الإيمان .. يبقى تعالوا نحب مصر .. نحب مصر .. ونحب كل حاجة فيها .. تعالوا نحب نيلها العظيم اللي بيجري جوه عروقنا ( مش عارف ليه حاسس إن التعبير ده مستهلك قوي ) أيوه هو النيل اللي إحنا كلنا بنشرب منه ده أصاب 35000 مصري بالفشل الكلوي .. وكمان إن 80 % منهم يصاب بفيروس الكبد الوبائي لترددهم على نفس الأجهزة .. وإن النسبة دي بتزيد بمعدل 8% سنويا .. لكن نرجع نقول هو إيه ذنب النيل .. ده النيل العذب هو الكوثر ..... وبعدين في الأول وفي الآخر أهو بيجري في عروقنا .. يعني مصيره يجيله التهاب كبدي ولا حاجة ... أقولكم بلاش النيل ..



تعالوا نحب الأهرامات .. الشامخة العالية .. حضارة 5000000000000 سنة .. ياسلام .. الفراعنة دول كانوا جامدين أوي .. الأهرامات دي أعجزت العالم .. ده حتى اليبانيين حاولوا يعملوا هرم وماقدروش .. بس هو في حد سأل مرة هو الهرم ده معمول ليه ؟؟ آه صحيح .. هم عملوا الهرم ده ليه .. يمكن عشان اليبانيين لما يحاولوا يعملوا زيه مايقدروش .. دول فراعنة وعارفين كل حاجة .. لأ بس الحقيقة بتقول إن الأهرامات دي ما هي إلا قبور .. أيوة تربة حيدفن فيها أحد الملوك الفراعنة ربنا يبشبش الطوبة اللي تحت دماغتهم .. بنوا كل ده عشان يتدفنوا فيه .. تخيلوا .. ملك سخر أعداد مهولة من البشر في عهده ويقال إن عدد الضحايا تجاوز 25000 قتيل .. عرفتوا ليه اليبانيين ماعرفوش يعملوا واحد زيه ؟؟!!

بلاااش الأهرامات ... تعالوا نحاول نحب حاجة تانية ..



مصر بلد الأمن والأمان .. والحرية والديموقراطية ..

صدقوا فعلا .. ده إحنا بنفطر ديموقراطية .. وبنتعشى ديموقراطية .. وبنتغدى ملوخية ..

ده مصر راعية حمى الديموقراطية في الوطن العربي والإنجليزي والفرنساوي كمان ..

طيب الكلام اللي أنا حقوله دلوقتي هو نص التقرير اللي كتبته لجنة حقوق الإنسان اللي شكله الرئيس نفسه :

1- 25000 معتقل سياسي في السجون المصرية .

2- ما يزيد عن 17 حالة وفاة بشبهة التعذيب داخل السجون منها جثث عثر عليها عارية خارج السجن خوفا من المسؤلية ( على فكرة لدي الأسماء والتواريخ وأسماء السجون لمن يريد) .

3 -وقائع كثيرة للضرب والتعذيب والصعق والتعليق لمجرد الاشتباه أو للحصول على معلومات.

4 -خطف وتعذيب ثلاث رؤساء تحرير صحف ( العربي ــ الوفد ــ الشعب )

5 -حبس 5 صحفيين من صحف مختلفة منهم واحد متهم بسب وقذف وزير الزراعة الأسبق تخيلوا ..

لأ .. يبقى فكك من الأمن والأمان والديموقراطية والحرية ..

بص على الحاجة الحلوة ياأخي .. شوف المناظر الحلوة والشوراع الواسعة والعربيات الجميلة ..

خلي بااااااااااااااااااااااالك .. أوعى تسرح .. ده في مصر 8 آلاف قتيل و32 ألف مصاب من حوادث الطرق سنويا .. يعني حوادث الطرق أهم أسباب الموت في مصر .. الله يكرمك بلاش اللعب بالنار .. بلاها الطرق .. بلاش تحب القاهرة بالليل واسكندرية بالنهار وكوم حماده ساعة الشفق ..

وبعد كل ده لازم تحب مصر .. مصر هي أمي .. نيلها هو دمي (يعني بيجري جوه عروقي) ..

أملا كفوفي من النيل وأشرب حلوة المية لو مصرية ..

عرفتوا بقى ليه كل اللي بيجي مصر لازم يرجعلها تاني .. عشان يتعالج على نفقة الدولة ..

بالمناسبة عارفين الدولة بتعالج كام مواطن على نفقتها .. في عام 2005 ...........

ولا أقولكم بلاش .. كفاية حب ....

الموضوع مش انا اللى كتبته ده منقول

بس لازم نحب مصر يا جماعه

دى ام الدنيا يا جماعة

[غلا روحي]

يسلمو سامية على موضوعك وانا عن نفسي اموت فيها

رحتها وفي المرتين كانت من احلى السفريات فلة وجنان